ប្រាកដណាស់ ការមានទំហំចង្កេះតូចអាចជាការបន្ថែមសម្រស់មួយកម្រិតសម្រាប់ស្ត្រី។ ប៉ុន្តែតើអ្នកធ្លាប់ស្រមៃមើល៍ថា តើវានឹងទៅជាយ៉ាងណាទេ ប្រសិនបើអ្នកមានទំហំចង្កេះតូចដែលមិនសមហេតុផល ឬមិនស៊ីនឹងរូបរាង? ជាការពិត នារីមកពីប្រទេសមីយ៉ាន់ម៉ាម្នាក់នេះ បានធ្វើឱ្យមនុស្សជាច្រើនមានការចាប់អារម្មណ៍មិនស្ទើរ បន្ទាប់ពីរូបថតរបស់នាងបង្ហាញពីរាងកាយមួយជុំ ជាមួយនឹងទំហំចង្កេះតូចមិនគួរឱ្យជឿ។
យោងតាមការចុះផ្សាយបានឲ្យដឹងថា នារីវ័យក្មេងដែលត្រូវបានគេស្គាល់គណនីហ្វេសប៊ុកឈ្មោះ Su Moh Moh Naing មានអាយុ ២៣ឆ្នាំ ហើយទំហំចង្កេះរបស់នាង គឺត្រឹមតែ ១៣,៧ អ៊ីញប៉ុណ្ណោះ ជាមួយនឹងលក្ខណៈពិសេសដែលមិនគួរឱ្យជឿ នាងបានក្លាយជាទីចាប់អារម្មណ៍របស់អ្នកលេងបណ្ដាញអ៊ីនធឺណិត នៅប្រទេសមីយ៉ាន់ម៉ា ត្រឹមតែមួយយប់ប៉ុណ្ណោះ បន្ទាប់ពីរូបថតរបស់នាងត្រូវបានគេបង្ហោះជាលើកដំបូង។
គណនីហ្វេសប៊ុកផ្លូវការរបស់នាង ដែលមានឈ្មោះថា Su Moh Moh Naing ពេលនេះមានអ្នក Follow ដល់ប្រមាណ ២៤ម៉ឺននាក់ ដែលគ្រប់គ្នាកោតសរសើរចំពោះរូបរាងដ៏អស្ចារ្យរបស់នាង ក៏ដូចជាបុគ្គលិកលក្ខណៈរាងរបស់នាង។ ចំណែកទំព័រហ្វេសប៊ុកមួយដែលមានឈ្មោះថា ASEAN Beauty Pageant ក៏បានចែករំលែករូបថតរបស់នាង ដែលទទួលបានការចាប់អារម្មណ៍យ៉ាងខ្លាំង ហើយមនុស្សម្នាស្ទើរមិនជឿនឹងភ្នែកទៀតផង។
នារីចង្កេះអង្ក្រងខាងលើ មានទីលំនៅតំបន់ Bago ក្បែរក្រុងតូចមួយមានឈ្មោះ Matama ភាគខាងត្បូងប្រទេសមីយ៉ាន់ម៉ា។ រូបភាព Su Naing នាពេលបច្ចុប្បន្ននេះ ស្ទើរតែបំបែកកំណត់ត្រាសម្រាប់ស្ត្រីដែលមានចង្កេះតូចជាងគេបំផុតនៅលើពិភពលោក ដែលបានគ្រងតំណែងដោយស្ត្រីជនជាតិអង់គ្លេស មានទំហំចង្កេះត្រឹម ១៣ អ៊ីញ។
មនុស្សមួយចំនួនយល់ថា វាជារឿងពិបាកនឹងជឿ ហើយថែមទាំងចោទសួរពីភាពត្រឹមត្រូវនៃរូបថតរបស់នាងផង ព្រោះអ្នកខ្លះគិតថា នាងអាចប្រើកម្មវិធីកែរូបភាព ឬ Photoshop ប៉ុន្តែនាងបានចេញមុខបញ្ជាក់យ៉ាងច្បាស់ថា ទំហំចង្កេះនាងគឺមកពីកំណើត មិនមានការវះ កា ត់ឆ្អឹងជំនីចេញ ឬស្លៀកសំលៀកបំពាក់រឹតៗយករាងតូចនោះទេ។ Su Naing អះអាងថា រូបរាងរបស់នាងគឺធម្មជាតិសុទ្ធសាធទាំងអស់។
នាងបាននិយាយថា «ខ្ញុំមានសុខភាពល្អជានិច្ច ហើយការរក្សារបបអាហារតែងតែប្រកាន់ខ្ជាប់ជានិច្ច ដូច្នេះមិនមានរឿងអ្វីគួរឲ្យព្រួយបារម្ភនោះទេ។ ខ្ញុំគិតថា មិនមានអ្វីខុសចំពោះរូបរាងខ្ញុំបែបនេះទេ។ ខ្ញុំចូលចិត្តបង្ហោះរូបថត និងបង្ហាញរូបរាងរបស់ខ្ញុំ មនុស្សជាច្រើនបានសរសើរ ដោយពួកគេភាគច្រើននិយយថា ជារូងរាងដ៏ស្រស់សោភា។
គួរបញ្ជាក់ថា ស្ត្រីដែលមានចង្កេះតូចខុសធម្មតាដូចជាម្ចាស់កំណត់ត្រា Guinness Record បច្ចុប្បន្ន នាង Ethel Granger ជនជាតិអង់គ្លេស មានចង្កេះទំហំ ១៣អ៊ីងពិតមែន ប៉ុន្តែនាងបានប្រើក្រណាត់រឹបចង្កេះពេញ ២៤ម៉ោងក្នុងមួយថ្ងៃ ដើម្បីឲ្យចង្កេះកាន់តែតូចទៅៗ និងបានវះ កាត់ជាច្រើនដង។ ឯតារាម៉ូដែលវេណេស៊ុយអេឡា Aleira Avendano បានប្រើក្រណាត់រឹបរាងយ៉ាងតឹង ដោយចំណាយពេល ២៣ម៉ោងក្នុងមួយថ្ងៃ ដើម្បីបានទំហំចង្កេះ ២០អ៊ីញផងដែរ៕
