បន្ទាប់ពីរងចាំអស់រយៈពេល ៩ ខែ ១០ ថ្ងៃ តារាកំប្លែង វ៉ាន់ នីឡា និង ស្វាមី ទទួលបានតំណក់ឈាមកូនស្រីដ៏គួរឱ្យស្រឡាញ់ម្នាក់ជាចំណងដៃហើយ។
លោកតា វ៉ិចទ័រ ដែលគេស្គាល់ជាឪពុកបង្កើតរបស់តារាកំប្លែង វ៉ាន់ នីឡា បានបង្ហោះរូបថតបង្ហាញក្ដីស្រឡាញ់ និង ភាពកក់ក្ដៅ ស្វាគមន៍ចៅស្រីបណ្ដូលចិត្តនៅរសៀលថ្ងៃទី ១២ ខែកញ្ញា ឆ្នាំ ២០២២ ដោយផលិតករដ៏ល្បីឈ្មោះរូបនេះបានលើកឡើងលើហ្វេសប៊ុកថា ៖ «ចៅទី ២ កូនរបស់កូនស្រី នីឡា។ សូមសុខសប្បាយណាចៅ»។
គួរឱ្យដឹងដែរថា តារាកំប្លែង វ៉ាន់ នីឡា និង ស្វាមី បានដឹកដៃគ្នាចូលរោងការយ៉ាងអធិកអធមកាលពីថ្ងៃទី ១៩ ខែមីនា ឆ្នាំ ២០២២ កន្លងទៅដោយមានការចូលរួមយ៉ាងច្រើនកុះករពីសំណាក់សិល្បករ សិល្បការិនី ហើយចំណងអាពាហ៍ពិពាហ៍របស់ពួកគេកាន់តែរឹងមាំ និង មានអត្ថន័យក្រោយទទួលបានកាដូធំ គឺកូនស្រីដ៏គួរឱ្យស្រឡាញ់ម្នាក់៕
